Shirika la kutetea haki za binadamu la Human Rights Watch limeitolea mwito serikali ya Jamhuri ya Kidemokrasi ya Congo kuhakikisha uchunguzi wenye ufanisi juu ya mauaji ya wanachama wanne wa chama cha siasa cha rais Felix Tshisekedi.
Julai 12, mwili wa Dodo Ntumba ulikutwa ukielea katika Mto Lubumbashi, na Julai 13, miili ya Mardoche Matanda na Heritier Mpiana, wote wakiwa na umri wa miaka 18, waliopolewa kutoka mtoni.
Agosti 3, familia ya Danny Kalmbayi mwenye umri wa miaka 29, iliukuta mwili wake katika chumba cha maiti, mwezi mmoja tangu walipomuona kwa mara ya mwisho.
Watu walioshuhudia waliliambia shirika la Huma Rights Watch kwamba miili yote ilikuwa na alama za kukatwa na kuondolewa viungo, ambazo zinaweza kuwa zilitokana na mateso.
Kwa mujibu wa Human Rights Watch, vifo hivyo vilitokea katika muktadha wa ukandamizaji unaozidi tangu mwanzoni mwa mwaka huu.
Shirika hilo limeitaka serikali kuchunguza taarifa kwamba marehemu hao walikuwa wanashikiliwa katika kituo cha kijeshi mjini Lubumbashi, kufuatia maadamano ya Julai 9.
